امریکی سینٹ کام نے تصدیق کی ہے کہ عراق میں گر کر تباہ ہونے والے امریکی فضائیہ کے ری فیولنگ طیارے کے عملے کے 4 اہلکار مارے گئے۔
غیر ملکی میڈیا رپورٹس کے مطابق امریکی فوج نے تصدیق کی ہے کہ مغربی عراق میں امریکی فضائیہ کا ایک ری فیولنگ طیارہ گر کر تباہ ہوا، جس کے نتیجے میں اس میں سوار 6 میں سے 4 اہلکار ہلاک ہو گئے جبکہ 2 کی تلاش جاری ہے۔
امریکی سینٹ کام نے بیان میں کہا ہے کہ امریکی ری فیولنگ طیارہ کے سی 135 عراق کے مغربی علاقے میں 12 مارچ کو گرا۔ ان کا کہنا ہے کہ امریکی طیارے کا نقصان جارحیت یا فرینڈلی فائر کے سبب نہیں ہوا، تاہم واقعے کی وجوہات جاننے کے لیے تحقیقات جاری ہیں۔
دوسری جانب ایران کے ختم الانبیا سینٹرل ہیڈکوارٹر نے دعویٰ کیا ہے کہ عراق کی مزاحمتی فورسز نے امریکا کے ری فیولنگ طیارے کو مار گرانے کی ذمہ داری قبول کرلی ہے۔
